పరధనముల కాసపడక పరులకు హితుఁడై
పరులు దనుఁ బొగడ నెగడక
పరు లలిగిన నలుగ నతఁడు పరముఁడు సుమతీ!
సిరి దా వచ్చిన వచ్చును
సలలితముగ నారికేళ సలిలము భంగిన్
సిరి దాఁ బోయిన బోవును
కరి మ్రింగిన వెలగపండు కరణిని సుమతీ!
స్త్రీలయెడ వాదులాడకు
బాలురతోఁ జెలిమిచేసి భాషింపకుమీ
మేలైన గుణము విడువకు
ఏలిన పతి నిందసేయ కెన్నడు సుమతీ!
ఒక వ్రేలు పిడికిలగునా?
ఒక చేతను చేయు పనులు నొరవుగనగునా
ఒక చెట్టు తోట యగునా?
ఒకడాడినమాట యందు నొప్పునె సుమతీ!
